સહારા ગ્રુપના 10 કરોડ થાપણદારોને તેમના પૈસા પાછા મળશે, અમિત શાહે રિફંડ પોર્ટલ લોન્ચ કર્યું

અમિત શાહે કહ્યું કે સરકારનું ધ્યાન એવા નાના રોકાણકારોને મદદ કરવાનું છે કે જેમણે ચાર સહકારી મંડળીઓમાં તેમના નાણાં જમા કરાવ્યા છે.

સહારા ગ્રુપના 10 કરોડ થાપણદારોને તેમના પૈસા પાછા મળશે, અમિત શાહે રિફંડ પોર્ટલ લોન્ચ કર્યું

સહારા ગ્રુપના 10 કરોડ થાપણદારો માટે સારા સમાચાર છે. ટૂંક સમયમાં જ થાપણદારોને તેમના પૈસા પાછા મળવાનું શરૂ થઈ જશે. આ માટે કેન્દ્રીય ગૃહ અને સહકાર મંત્રી અમિત શાહે મંગળવારે CRCS-સહારા રિફંડ પોર્ટલ લોન્ચ કર્યું. રિફંડ પોર્ટલ લોંચ કરતાં કેન્દ્રીય મંત્રી અમિત શાહે જણાવ્યું હતું કે, "સહારા રિફંડ પોર્ટલના લોન્ચિંગ સાથે સહારા ગ્રુપની ચાર સહકારી મંડળીઓમાં ફસાયેલા થાપણદારોના નાણાં પરત કરવાની પ્રક્રિયા શરૂ થઈ ગઈ છે".

તેમણે કહ્યું કે શરૂઆતમાં 10,000 રૂપિયા રોકાણકારોને અજમાયશના આધારે પરત કરવામાં આવશે. જો અજમાયશ સફળ થાય છે, તો રિફંડની રકમ ધીમે ધીમે વધારી શકાય છે.

એક કરોડ સાત લાખ રોકાણકારો રિફંડ પોર્ટલ પર નોંધણી કરાવી શકે છે અને પ્રારંભિક તબક્કામાં 10,000 રૂપિયા સુધીનો દાવો કરી શકે છે. શાહના જણાવ્યા અનુસાર, 4 કરોડ થાપણદારો એવા છે જે 10,000 રૂપિયા સુધીની રકમ મેળવવાને પાત્ર છે.

અમિત શાહે જણાવ્યું હતું કે એકવાર આ પહેલ સફળ થયા પછી, સહારા જૂથની સહકારી મંડળીઓમાં વધુ નાણાં અટવાયેલા થાપણદારોના  દાવાઓના સમાધાન માટે વધુ નિર્ણયો લેવામાં આવશે. આ સાથે તેમણે કહ્યું કે રિફંડની સમગ્ર પ્રક્રિયા ઓનલાઈન થશે.

પોર્ટલ કેવી રીતે કામ કરશે?

થાપણદારોએ તેમના આધારને મોબાઈલ અને બેંક ખાતા સાથે લિંક કરવું પડશે અને પૈસા મેળવવા માટે રસીદની વિગતો આપવી પડશે. તેમણે કહ્યું કે રિફંડની આગળની પ્રક્રિયા માટે, થાપણદારોએ એક ફોર્મ ડાઉનલોડ કરવું પડશે, તેને ભરવું પડશે અને તેને ફરીથી પોર્ટલ પર અપલોડ કરવું પડશે.

રિફંડ મેળવવામાં કેટલો સમય લાગશે?

શાહે કહ્યું કે દાવેદારના બેંક ખાતામાં 45 દિવસમાં પૈસા જમા થઈ જશે. જો કોઈને ઓનલાઈન સેવાઓનો ઉપયોગ કેવી રીતે કરવો તે ખબર ન હોય તો શું? આવા લોકો માટે, કેન્દ્રીય મંત્રીએ આ લોકોને CSC ડિજિટલ સેવાઓની મદદ લેવા અને પોતાને નોંધણી કરવા કહ્યું છે.

CRCS સહારા રિફંડ પોર્ટલ શું કરશે?

CRCS-સહારા રિફંડ પોર્ટલનો ઉદ્દેશ સહકારી મંડળીઓના સભ્યોના હિતોનું રક્ષણ કરવાનો છે. આ પોર્ટલ સહારા ગ્રુપ - સહારા ક્રેડિટ કોઓપરેટિવ સોસાયટી લિમિટેડ, સહારાયન યુનિવર્સલ મલ્ટીપર્પઝ સોસાયટી લિમિટેડ, હમારા ઈન્ડિયા ક્રેડિટ કોઓપરેટિવ સોસાયટી લિમિટેડ અને સ્ટાર્સ મલ્ટીપર્પઝ કોઓપરેટિવ સોસાયટી લિમિટેડની સહકારી મંડળીઓમાં નાણાંનું રોકાણ કરનારા થાપણદારોના સાચા દાવાઓને ઉકેલવામાં મદદ કરશે.

સુપ્રીમ કોર્ટે આદેશ કર્યો હતો

સુપ્રીમ કોર્ટે 29 માર્ચ 2023ના તેના આદેશમાં જણાવ્યું હતું કે સહકારી મંડળીઓના સાચા થાપણદારોના કાયદેસરના લેણાંની ચુકવણી માટે 'સહારા-સેબી રિફંડ એકાઉન્ટ'માંથી સેન્ટ્રલ રજિસ્ટ્રાર ઑફ કોઓપરેટિવ સોસાયટીઝ (સીઆરસીએસ)ને 5000 કરોડ રૂપિયા ટ્રાન્સફર કરવામાં આવે. 
 

Share On Social Media