નેપાળના બાગમતી પ્રાંતમાં ભયાનક અકસ્માત, બસ ત્રિશુલી નદીમાં પડી જતાં 7નાં મોત

નેપાળના બાગમતી પ્રાંતમાં એક દુ:ખદ બસ અકસ્માત થયો છે. પ્રાથમિક માહિતી અનુસાર ઓછામાં ઓછા 7 લોકોના મોત અને 30થી વધુ લોકો ઘાયલ થયા હોવાના અહેવાલ છે.

નેપાળના બાગમતી પ્રાંતમાં ભયાનક અકસ્માત, બસ ત્રિશુલી નદીમાં પડી જતાં 7નાં મોત

કાઠમંડુ: નેપાળના બાગમતી પ્રાંતમાં બુધવારે વહેલી સવારે એક ભયાનક બસ અકસ્માતના સમાચાર સામે આવી રહ્યા છે. મળતી માહિતી મુજબ, મુસાફરોને લઈને જઈ રહેલી બસ અચાનક સંતુલન ગુમાવી દેતાં નદીમાં પડી ગઈ હતી. બસ નદીમાં પડી જતાં એક મહિલા સહિત ઓછામાં ઓછા સાત લોકોના મોત થયા હતા અને 30 લોકો ઘાયલ થયા હતા. ઘાયલોને નજીકની હોસ્પિટલમાં દાખલ કરવામાં આવ્યા છે. નેપાળના દૈનિક અખબાર 'ધ હિમાલયન ટાઈમ્સ'ના સમાચાર અનુસાર ઘાટબેસી વિસ્તારમાં કાઠમંડુ જઈ રહેલી પેસેન્જર બસ પર ડ્રાઈવર કાબૂ ન રાખી શક્યો અને તે ત્રિશુલી નદીમાં પડી ગઈ.

ધાડિંગ જિલ્લા પોલીસ કચેરીના પોલીસ અધિક્ષક (એસપી) ગૌતમ કેસીના જણાવ્યા અનુસાર, અકસ્માતમાં એક મહિલા સહિત ઓછામાં ઓછા સાત લોકોના મોત થયા હતા. તેમણે કહ્યું કે આ અકસ્માતમાં ઓછામાં ઓછા 30 મુસાફરો ઘાયલ થયા છે. જણાવવામાં આવી રહ્યું છે કે નેપાળ પોલીસ, સશસ્ત્ર પોલીસ દળ અને નેપાળ આર્મીની સાથે સ્થાનિક લોકોએ આ લોકોને બચાવ્યા હતા. ઘાયલોને બચાવી લેવામાં આવ્યા હતા અને સ્થાનિક આરોગ્ય સુવિધામાં પ્રાથમિક સારવાર પછી, તેમને વધુ સારવાર માટે કાઠમંડુ લઈ જવામાં આવ્યા હતા.

મૃતકોની ઓળખ થઈ શકી નથી

સમાચાર અનુસાર, મૃતકોની ઓળખ હજુ સુધી થઈ નથી. પોલીસે બસ ડ્રાઈવરની ધરપકડ કરી લીધી છે. જ્યારે બસ નદીમાં પડી ત્યારે મુસાફરોને થયેલી ઇજાઓને ધ્યાનમાં રાખીને મૃત્યુઆંક વધવાની ધારણા છે. અહેવાલમાં જણાવાયું છે કે સશસ્ત્ર પોલીસ દળો અને ડિઝાસ્ટર મેનેજમેન્ટ ટ્રેનિંગ સ્કૂલ, કુરિન્તર, ચિતવનની એક ટીમ પણ બચાવ કામગીરીમાં સામેલ હતી.

Share On Social Media