ભારતના નાગાપટ્ટનમ અને શ્રીલંકાના કંકેસંથુરાઈ વચ્ચે 40 વર્ષ પછી ફરી ફેરી સર્વિસ શરૂ થઈ

ભારતના નાગાપટ્ટિનમ અને શ્રીલંકાના કંકેસંથુરાઈ વચ્ચેની ફેરી સર્વિસ 40 વર્ષ પછી ફરી શરૂ થઈ છે. વિદેશ મંત્રી ડૉ. એસ. જયશંકર, કેન્દ્રીય મંત્રી સર્વાનંદ સોનોવાલ, રાજ્ય મંત્રી ઇ.વી. વેલુ અને રઘુપતિએ વર્ચ્યુઅલ રીતે પ્રથમ ફેરી સર્વિસને ફ્લેગ ઓફ કરી હતી. આ બોટને શ્રીલંકાના કંકેસંથુરાઈ બંદરે પહોંચવામાં ત્રણ કલાક લાગશે.

ભારતના નાગાપટ્ટનમ અને શ્રીલંકાના કંકેસંથુરાઈ વચ્ચે 40 વર્ષ પછી ફરી ફેરી સર્વિસ શરૂ થઈ

આ પ્રસંગે વડાપ્રધાન નરેન્દ્ર મોદીએ કહ્યું કે આ સેવા ભારત અને શ્રીલંકા વચ્ચેના રાજદ્વારી અને આર્થિક સંબંધોમાં એક નવા અધ્યાયની શરૂઆત છે. તેમણે કહ્યું કે સુબ્રમણ્યમ ભારતીએ ભારત અને શ્રીલંકાને જોડતા પુલનો ઉલ્લેખ કર્યો છે અને બંને દેશો વચ્ચે આર્થિક ભાગીદારી અંગેના વિઝન પેપરમાં ભારત અને શ્રીલંકાના લોકો માટે કનેક્ટિવિટી વધારવા પર પણ ભાર મૂકવામાં આવ્યો છે. શ્રી મોદીએ કહ્યું કે દિલ્હી અને કોલંબો વચ્ચેની સીધી હવાઈ સેવા વર્ષ 2015માં શરૂ કરવામાં આવી હતી અને શ્રીલંકાથી ઉત્તર પ્રદેશના કુશીનગર સુધીની સીધી ફ્લાઈટની શરૂઆત એક ઐતિહાસિક સુવિધા હતી.

પ્રધાનમંત્રીએ કહ્યું કે બંને દેશ નાણાકીય ટેક્નોલોજી અને ઉર્જા દ્વારા એકબીજા માટે ઉપયોગી સાબિત થઈ રહ્યા છે. તેમણે કહ્યું કે ઉર્જા ગ્રીડ એ બંને દેશો વચ્ચેના પરસ્પર સંબંધોનું એક મહત્વપૂર્ણ પાસું છે જેનો ઉદ્દેશ્ય વિકાસના લાભો દરેક વ્યક્તિ સુધી પહોંચાડવાનો છે.

આ પ્રસંગે વિદેશ મંત્રી ડૉ. એસ. જયશંકરે કહ્યું કે, વડા પ્રધાન નરેન્દ્ર મોદીએ ફેરી સર્વિસ શરૂ કરીને બંને દેશોના લોકોની આકાંક્ષાઓને અમલમાં મૂકી છે. તેમણે એમ પણ કહ્યું કે શ્રી મોદી ભારતના પ્રથમ વડાપ્રધાન છે જેમણે જાફનાના પુનઃનિર્માણ માટે સહાય પૂરી પાડી છે.

શ્રીલંકાના મંત્રી ડી.સિલ્વાએ કહ્યું કે ફેરી સર્વિસ શરૂ થવાથી બંને દેશોના લોકો વચ્ચેના સંબંધો સુધરશે. શ્રી ડી. સિલ્વાએ વડાપ્રધાન નરેન્દ્ર મોદીના અસાધારણ વ્યક્તિત્વની પ્રશંસા કરી હતી. તેમણે કહ્યું કે ઉત્તરી શ્રીલંકાના લોકો બોધગયા અને ભારતમાં અન્ય સ્થળોની મુલાકાત લેવા ઉત્સુક છે. શ્રી ડી. સિલ્વાએ શ્રીલંકામાં રૂ. 60 કરોડના ખર્ચે બનેલ બંદર માટે ભારતની સહાય બદલ આભાર વ્યક્ત કર્યો હતો. તેમણે એમ પણ કહ્યું કે શ્રીલંકાના તલાઈમન્નાર અને ભારતના રામેશ્વરમ વચ્ચેની સેવા પણ ટૂંક સમયમાં શરૂ થશે.

બંદર રાજ્ય મંત્રી ઈ.વી. વેલુએ કહ્યું કે નાગાપટ્ટિનમ પોર્ટને કારણે શ્રીલંકા અને સિંગાપોર વચ્ચેના વેપારમાં વધારો થયો છે. તેમણે કહ્યું કે બારમાસી પેસેન્જર ફેરી સર્વિસ બંને દેશોના લોકો માટે આખા વર્ષ દરમિયાન મુસાફરી કરવાનું સરળ બનાવશે.

Share On Social Media