ભૂસ્ખલન તેમજ હિમવર્ષાના કારણે કેદારનાથ યાત્રા 3 મે સુધી રોકી દેવાઈ

હવામાન વિભાગનું માનવું છે કે આગામી દિવસોમાં પણ હવામાન ખરાબ રહેશે. વરસાદની સાથે સાથે હિમવર્ષા પણ આ રીતે ચાલુ રહેવાની શક્યતા છે

ભૂસ્ખલન તેમજ હિમવર્ષાના કારણે કેદારનાથ યાત્રા 3 મે સુધી રોકી દેવાઈ

ખરાબ હવામાનને કારણે ઉત્તર ભારતના ઘણા ભાગોમાં વરસાદ પડી રહ્યો છે. દેશની રાજધાની દિલ્હીમાં રવિવારથી અવિરતપણે વરસાદ પડી રહ્યો છે. તે જ સમયે, ઉત્તરાખંડના પહાડી વિસ્તારોમાં હિમવર્ષા થઈ રહી છે. જેના કારણે તાજેતરમાં શરૂ થયેલી ચારધામની યાત્રા ખોરવાઈ ગઈ છે. ઉત્તરાખંડ સરકારે પણ 3 મે સુધી કેદારનાથ ધામની મુલાકાત પર પ્રતિબંધ મૂક્યો છે.

સરકારે કેદારનાથના માર્ગ પર વરસાદ અને હિમવર્ષાના કારણે લેન્ડ સ્લાઈડિંગ થવાની સંભાવના વ્યક્ત કરી છે. ભક્તોને કોઈ નુકસાન ન થાય તે માટે સરકાર આ અંગે સંપૂર્ણ સતર્ક પગલાં લઈ રહી છે. સોમવારે ઉત્તરાખંડના ઊંચાઈવાળા વિસ્તારોમાં વરસાદની સાથે ઘણી જગ્યાએ હિમવર્ષા થઈ હતી.

આગામી દિવસોમાં હવામાન ખરાબ રહેવાની શક્યતા

રિપોર્ટ્સ અનુસાર, સરકારની સાથે સાથે હવામાન વિભાગે પણ ચેતવણી જાહેર કરી છે. ઉત્તરાખંડના હવામાન વિભાગનું માનવું છે કે આગામી દિવસોમાં પણ હવામાન ખરાબ રહેશે. વરસાદની સાથે સાથે હિમવર્ષા પણ આ રીતે ચાલુ રહેવાની શક્યતા છે.

કેદારનાથ ધામ યાત્રાના રજીસ્ટ્રેશન પર પ્રતિબંધ

એડિશનલ કમિશનર ગઢવાલ એડમિનિસ્ટ્રેશન નરેન્દ્ર સિંહ કુરિયાલે વાતચીતમાં જણાવ્યું કે કેદારનાથ ધામમાં મોટી સંખ્યામાં શ્રદ્ધાળુઓ દર્શન કરવા પહોંચી રહ્યા છે. કેદારનાથ ધામ આવેલા આ તમામ શ્રદ્ધાળુઓની સુરક્ષાની જવાબદારી ઉત્તરાખંડ સરકારની છે. હાલની પરિસ્તીથી તેમજ ખરાબ હવામાનને જોતા વહીવટીતંત્ર ખાસ સાવચેતી રાખી રહ્યું છે. કારણ કે હવામાન વિભાગે આગામી દિવસોમાં વધુ હિમવર્ષા માટે એલર્ટ જાહેર કર્યું છે. આ કારણે સરકારે કેદારનાથ તીર્થયાત્રાના રજીસ્ટ્રેશન પર 3 મે સુધી પ્રતિબંધ લગાવી દીધો છે.

બદ્રીનાથ ધામના માર્ગ પર લેન્ડ સ્લાઇડિંગ

આ સાથે બદ્રીનાથ ધામના માર્ગ પર લેન્ડ સ્લાઈડિંગ પણ થયું હતું જેથી કરીને શ્રદ્ધાળુઓને અધવચ્ચે જ અટકાવી દેવા પડ્યા હતા. આપને જણાવી દઈએ કે બાબા કેદારનાથ ધામના દરવાજા 25 એપ્રિલે ખોલવામાં આવ્યા હતા. તે જ સમયે, 27 એપ્રિલના રોજ, બદ્રીનાથ ધામના દરવાજા ખોલવામાં આવ્યા હતા. જ્યારથી બંને ધામના દરવાજા ખુલ્યા છે. મોટી સંખ્યામાં ભક્તો દર્શન કરવા પહોંચી રહ્યા છે.

હેલિકોપ્ટર દ્વારા ફૂલોની વર્ષા કરવામાં આવી

મંગળવારે, જ્યારે વર્ષ 2023 માં પ્રથમ વખત કેદારનાથ મંદિર ખુલ્યું ત્યારે હેલિકોપ્ટર દ્વારા ફૂલોની વર્ષા કરવામાં આવી હતી. ગઈકાલથી કેદારનાથ ધામમાં શ્રદ્ધાળુઓ મોટી સંખ્યામાં પહોંચી રહ્યા છે. કેદારનાથની આસપાસનું હવામાન પણ હવે સ્વચ્છ છે. બુધવારે એક ભક્તે બાબા કેદારનાથને સોનાનું છત્ર અને ઘડો દાન કર્યો હતો. ભક્ત દ્વારા દાનમાં આપવામાં આવેલા આ છત્ર અને ઘડાને મંદિર પરિસરમાં સ્થાપિત કરવામાં આવશે. કેદારનાથ ધામના દરવાજા 25 એપ્રિલના રોજ ભક્તો માટે ખોલવામાં આવ્યા છે. મંગળવારે મોટી સંખ્યામાં ભક્તોએ બાબા કેદારનાથના દર્શન કર્યા હતા.

Share On Social Media