મુકેશ અંબાણીએ રિલાયન્સના સૌથી જૂના કર્મચારીને 1500 કરોડનું ઘર ગિફ્ટ કર્યું

22 માળની બિલ્ડિંગમાં પહેલા સાત માળ માત્ર પાર્કિંગના- આવો જાણીએ કોણ છે મનોજ મોદી

મુકેશ અંબાણીએ રિલાયન્સના સૌથી જૂના કર્મચારીને 1500 કરોડનું ઘર ગિફ્ટ કર્યું

ભારતના અગ્રણી અને નામાંકિત ઉદ્યોગપતિ તેમજ રિલાયન્સ ઇન્ડસ્ટ્રીઝના ચેરમેન મુકેશ અંબાણીએ પોતાના મિત્ર અને રિલાયન્સના સૌથી જૂના કર્મચારી એવા મનોજ મોદીને મુંબઈમાં 1500 કરોડ રૂપિયાનું ઘર ગિફ્ટમાં આપ્યું છે. મનોજ મોદીને મુકેશ અંબાણીનો જમણો હાથ માનવામાં આવે છે. એટલે જ તેમને એક ભરોસાપાત્ર રિલાયન્સ કર્મચારી ઉપરાંત મુકેશ અંબાણીના મિત્રનો પણ દરજ્જો મળ્યો છે. રિપોર્ટ મુજબ, રિલાયન્સ કંપની માટે લેવામાં આવતા તમામ મહત્વના નિર્ણયોમાં તેમની સલાહ સંમતિ આવશ્યક હોય છે.

અંબાણીના બાળકોના મેન્ટર પણ કહેવાય છે મનોજ મોદી 

મનોજ મોદી રિલાયન્સના સૌથી જૂના કર્મચારી હોવાથી તેઓ વર્ષોથી કંપનીમાં પોતાની સેવાઓ નિશ્વાર્થપણે આપી રહ્યા છે. તેમની ઈમાનદારી અને નિષ્ઠાના પરિણામે મુકેશ અંબાણીના બાળકો પણ તેમની સલાહ માને છે. તેમને આકાશ અંબાણી, અનંત અંબાણી અને ઈશા અંબાણીના મેન્ટર પણ કહેવાય છે. એટલે જ મુકેશ અંબાણીએ પોતાના સૌથી પ્રિય કર્મચારી અને મિત્રને તેમની મહેનતના ફળ સ્વરૂપે 22 માળની બિલ્ડિંગ ભેટમાં આપી છે.

ઘરનું ફર્નિચર ઇટલીથી આવશે, પહેલા સાત માળ પર માત્ર પાર્કિંગ હશે

મુકેશ અંબાણીએ મનોજ મોદીને જે ઘર ભેટમાં આપ્યું છે તે મુંબઈના પૉશ વિસ્તાર ગણાતા નેપિયન સી રોડ પર આવેલું છે. આ ઘર 1.7 લાખ સ્ક્વેર ફૂટ જમીન પર બનાવવામાં આવ્યું છે. આ બિલ્ડિંગનું નામ ‘વૃંદાવન’ રાખવામાં આવ્યું છે. બિલ્ડિંગની શરૂઆતના 7 માળ પર પાર્કિંગની સુવિધા હશે. ઘરનું મોટાભાગનું ફર્નિચર ઇટલીથી મંગાવવામાં આવી રહ્યું છે. અહેવાલો અનુસાર, આ ઘર મળ્યા બાદ મનોજ મોદીએ મુંબઈ સ્થિત 41.5 કરોડ રૂપિયાના પોતાના 2 ફ્લેટ વેચી દીધા છે.

મુકેશ અંબાણી અને મનોજ મોદીએ સાથેજ અભ્યાસ કર્યો છે

ઉલ્લેખનીય છે કે, 55 વર્ષીય મનોજ મોદી મૂળ ગુજરાતના છે. તેમણે અને મુકેશ અંબાણીએ મુંબઈમાં યુનિવર્સિટી ડિપાર્ટમેન્ટ ઓફ કેમિકલ ટેક્નોલોજીમાં સાથે અભ્યાસ કર્યો છે. અભ્યાસ પૂર્ણ થયા બાદ જ્યારે મુકેશ અંબાણીએ પોતાના પિતા સાથે રિલાયન્સમાં કામ કરવાનું શરુ કર્યું ત્યારે તેમણે પોતાના ક્લાસમેટ મનોજને પણ બોલાવી લીધા.
રિપોર્ટ મુજબ, મનોજ મોદી 1980ના દાયકાની શરૂઆતમાં રિલાયન્સ સાથે જોડાયા હતા અને ત્યારથી ભારતની સૌથી મોટી કંપનીમાં સેવા આપી રહ્યા છે.

સોશિયલ મીડિયા પર થઈ રહી છે 1500 કરોડ રૂપિયાની ભેટની ચર્ચા

મનોજ મોદી રિલાયન્સમાં આટલી પ્રતિષ્ઠિત વ્યક્તિ હોવા છતાં ઝાકઝમાળથી હંમેશા દૂર રહે છે. આ જ કારણ છે કે તેઓ સોશિયલ મીડિયા પ્લેટફોર્મ પર અવેલેબલ નથી. જોકે, તેમને મળેલી 1500 કરોડ રૂપિયાની ભેટની ચર્ચા હાલ સોશિયલ મીડિયા પર ખૂબ થઈ રહી છે. યુઝર્સ મુકેશ અંબાણીની દરિયાદિલીની પ્રશંસા કરી રહ્યા છે.
 
 

Share On Social Media