ગીર સોમનાથ : જિલ્લામાં સ્વાતંત્ર્ય પર્વ અંતર્ગત નાગરિકોમાં હર ઘર તિરંગા અભિયાનનો અનેરો ઉત્સાહ જોવા મળી રહ્યો છે. જિલ્લામાં તાલુકા અને નગરપાલિકા કક્ષાની ઉજવણી અંતર્ગત ઠેર-ઠેર તિરંગા યાત્રાઓ યોજાઈ રહી છે.
સ્વાતંત્ર્ય પર્વની આન, બાન, શાનથી ઉજવણીની તૈયારીઓ વચ્ચે ઉના ખાતે તિરંગા યાત્રા યોજાઈ હતી. જેમાં બળદગાડાંને શણગારવામાં આવ્યાં હતાં. આ તિરંગા યાત્રામાં વિદ્યાર્થીઓએ ‘ગાંધીજી’, ‘ભારતમાતા’ સહિતની વેશભૂષા ધારણ કરી હતી.
‘વંદે માતરમ’, ‘ભારત માતા કી જય’ના જયઘોષ સાથે ઉના ખાતેથી નીકળેલી ભવ્યાતિભવ્ય તિરંગા યાત્રામાં નાગરિકોનો અભૂતપૂર્વ ઉત્સાહ જોવા મળ્યો હતો. આ તિરંગા યાત્રામાં પદાધિકારીશ્રીઓ સહિત ઉના પ્રાંત અધિકારી શ્રી ચિરાગ હિરવાણિયા અને વહીવટી તંત્રના
અધિકારીશ્રીઓ, કર્મચારીઓ, નાગરિકો અને વિદ્યાર્થીઓ ઉત્સાહપૂર્વક સહભાગી થયા હતાં.
