નવી દિલ્હી : ફ્રાન્સના છ એરપોર્ટને બુધવારે "હુમલાનો ખતરો" ધરાવતા ઈમેલ બાદ ખાલી કરાવવામાં આવ્યો હતો. મળતી માહિતી અનુસાર, પેરિસ નજીકના લિલી, લિયોન, નેન્ટેસ, નાઇસ, તુલોઝ અને બ્યુવેસ એરપોર્ટને ખાલી કરાવવામાં આવ્યા છે. સમાચાર એજન્સી એએફપીના સમાચાર મુજબ હુમલાની ધમકી બાદ સુરક્ષા વધારી દેવામાં આવી છે. આ ધમકી કયા સંગઠન દ્વારા આપવામાં આવી હતી અને તેનો સ્ત્રોત શું હતો તે અંગે ફ્રાન્સ દ્વારા હજુ સુધી કોઈ માહિતી આપવામાં આવી નથી.
ઉલ્લેખનીય છે કે ઈઝરાયેલ અને ગાઝા વચ્ચે ચાલી રહેલી હિંસા બાદ સમગ્ર વિશ્વમાં સતર્કતા વધારી દેવામાં આવી છે. ફ્રાન્સ સહિત વિશ્વના ઘણા દેશોએ હમાસ દ્વારા ઈઝરાયેલ પરના હુમલાની નિંદા કરી હતી. તમને જણાવી દઈએ કે ગાઝા પટ્ટીમાં ઈઝરાયેલ અને પેલેસ્ટાઈન વચ્ચે યુદ્ધ ચાલી રહ્યું છે. બંને પક્ષો સતત એકબીજા પર હુમલો કરી રહ્યા છે.
ઇઝરાયેલ અને હમાસ વચ્ચે આક્ષેપો
ગાઝામાં હોસ્પિટલ પર થયેલા હુમલાને લઈને ઈઝરાયેલ અને હમાસ વચ્ચે આક્ષેપો અને પ્રતિ-આક્ષેપોનો દોર ચાલુ છે. હોસ્પિટલ પર થયેલા આ હુમલામાં લગભગ 500 લોકોના મોત થયા હોવાના અહેવાલ છે. આ હુમલા અંગે હમાસનું કહેવું છે કે હોસ્પિટલમાં વિસ્ફોટ ઈઝરાયેલના રોકેટના કારણે થયો હતો. જ્યારે ઈઝરાયલ સરકારના કહેવા પ્રમાણે તેમને આ હુમલા સાથે કોઈ લેવાદેવા નથી.
