મુસાફરોની મુસાફરીને સરળ બનાવવા માટે કેબિનેટે ભારતીય રેલવેના છ મલ્ટી-ટ્રેકિંગ પ્રોજેક્ટને મંજૂરી આપી છે. તેનો ઉદ્દેશ્ય તેલની આયાત ઘટાડવા અને CO2 ઉત્સર્જન ઘટાડવા અને લોજિસ્ટિક્સ ખર્ચ ઘટાડવાનો છે. કેબિનેટના આ નિર્ણયથી રેલ ટ્રાફિકમાં પણ વધારો થશે. સરકારના જણાવ્યા અનુસાર, આ પ્રોજેક્ટનો ખર્ચ અંદાજે 12,343 કરોડ રૂપિયા થશે. આ પ્રોજેક્ટ 2029-30 સુધીમાં પૂર્ણ થશે.
ભીડ ઘટશે, પ્રોજેક્ટ 6 રાજ્યોના 18 જિલ્લાઓને આવરી લેશે
પીએમ નરેન્દ્ર મોદીની અધ્યક્ષતામાં આર્થિક બાબતોની કેબિનેટ સમિતિએ આ પ્રોજેક્ટને મંજૂરી આપી દીધી છે. આમાં 100 ટકા ફંડિંગ કેન્દ્ર સરકાર કરશે. મલ્ટી-ટ્રેકિંગ દરખાસ્તો કામગીરીને સરળ બનાવશે અને ભીડ ઘટાડશે, જેનાથી ભારતીય રેલ્વેના સૌથી વ્યસ્ત વિભાગો પર ખૂબ જ જરૂરી ઈન્ફ્રાસ્ટ્રક્ચરનો વિકાસ થશે. રાજસ્થાન, આસામ, તેલંગાણા, ગુજરાત, આંધ્રપ્રદેશ અને નાગાલેન્ડના 18 જિલ્લાઓને આવરી લેતી 6 (છ) યોજનાઓ ભારતીય રેલ્વેના વર્તમાન નેટવર્કને 1020 કિલોમીટર સુધી વિસ્તૃત કરશે.
પ્રોજેક્ટ પીએમ ગતિ શક્તિ સાથે જોડાયેલ હશે, અવિરત કનેક્ટિવિટી મળશે
સરકાર દ્વારા આપવામાં આવેલી માહિતી અનુસાર, આ પ્રોજેક્ટ મલ્ટી મોડલ કનેક્ટિવિટી માટે PM-ગતિ શક્તિ નેશનલ માસ્ટર પ્લાનનું પરિણામ છે. તે લોકો, માલસામાન અને સેવાઓની અવરજવર માટે કોઈપણ અવરોધ વિના સીમલેસ કનેક્ટિવિટી પ્રદાન કરશે.
