મુંબઈ: ટીવીનો લોકપ્રિય રિયાલિટી શો બિગ બોસ 19 હાલમાં ચર્ચામાં છે અને તેમાં તાજેતરમાં બનેલી એક ઘટનાએ દર્શકોને ચોંકાવી દીધા હતા. શોની નવી કેપ્ટન ફરહાના ભટ્ટે અન્ય કન્ટેસ્ટન્ટ શહબાઝ બદેશાને જોરદાર થપ્પડ મારી દીધી હતી. જોકે, આ ઘટનાને શહબાઝે શાંતિથી અને હસતા મોઢે ટાળી દીધી હતી, જેના કારણે આનો મોટો મુદ્દો ન બન્યો. વીકએન્ડ કા વાર (Weekend Ka Vaar)માં હોસ્ટ સલમાન ખાને આ થપ્પડકાંડનો ઉલ્લેખ કર્યો હતો અને સાથે જ શહબાઝની ટીમે પણ સોશિયલ મીડિયા પર આ અંગે સત્તાવાર નિવેદન બહાર પાડ્યું છે. આ ઘટના ક્યારે બની, કોણે કોને થપ્પડ મારી અને તેના પર સલમાન ખાને શું પ્રતિક્રિયા આપી – તે અહીં જાણો.
થપ્પડકાંડ અને શહબાઝની સમજદારી
બિગ બોસના ઘરમાં દરરોજ ઝઘડા અને ઉગ્ર દલીલો જોવા મળે છે, પરંતુ શનિવારે થયેલા 'વીકએન્ડ કા વાર'માં સલમાન ખાને કેટલાક કન્ટેસ્ટન્ટ્સનો ક્લાસ લીધો, જેમાં ફરહાના ભટ્ટનું નામ પણ સામેલ હતું. ફરહાનાએ એક સામાન્ય વાત પર ગુસ્સે થઈને શહબાઝ બદેશાને થપ્પડ મારી દીધી હતી. ઘરના અન્ય સભ્યો આ જોઈને આશ્ચર્યચકિત થઈ ગયા હતા, પરંતુ શહબાઝે તરત જ આ વાતને હળવાશમાં લઈને વાતને આગળ વધારવા દીધી નહોતી.
શહબાઝે આ બાબતે કોઈ મોટો વિવાદ ઊભો ન કરતા પોતાની મિત્રતા જાળવી રાખી. જોકે, આ ઘટના બહાર આવતાં જ શહબાઝની ટીમે આ અંગે મીડિયા સમક્ષ પ્રતિક્રિયા આપી છે.
શહબાઝની ટીમનું સત્તાવાર નિવેદન
શહબાઝ બદેશાની ટીમે સોશિયલ મીડિયા પર એક પોસ્ટ દ્વારા ફરહાના ભટ્ટને ચેતવણી આપતા જણાવ્યું હતું કે, "શહબાઝ સ્ત્રીનું સન્માન કરે છે, તેનો મતલબ એ નથી કે તે સ્ટેન્ડ લઈ શકતો નથી. તે ઈચ્છત તો આ વાતનો બહુ મોટો મુદ્દો બનાવી શકતો હતો, પણ તેણે સમજદારી દાખવી અને મિત્રતા નિભાવી. તે એક સાચો મિત્ર છે, તેને ક્યારેય હળવાશમાં ન લેવો." આ નિવેદન સ્પષ્ટ સંકેત આપે છે કે શહબાઝે જાણીજોઈને આ મામલાને શાંત પાડ્યો હતો.
સલમાન ખાને શું કહ્યું? ઘરની બહાર થવાના હતા ફરહાના?
વીકએન્ડ કા વારમાં હોસ્ટ સલમાન ખાને આ થપ્પડકાંડ અંગે ટિપ્પણી કરતા કહ્યું, "મેં ફરહાનાને જોયું હતું, તમે ઘણું જોરથી માર્યું હતું. શહબાઝે આ વાતનો મુદ્દો ન બનાવ્યો અને તરત જ મૂવ ઓન થઈ ગયો. જો આ કોઈ અન્ય કન્ટેસ્ટન્ટ સાથે થયું હોત, તો આ એક મોટો મુદ્દો બન્યો હોત અને નિયમોના ભંગ બદલ તમને ઘરની બહાર કરી દેવામાં આવ્યા હોત. પણ શહબાઝે મિત્રતાના નાતે તમને બચાવ્યા, નહીંતર ખરાબ થાત." સલમાનના આ નિવેદન પરથી સ્પષ્ટ થાય છે કે શહબાઝના નિર્ણયને કારણે જ ફરહાના ભટ્ટને નિયમોના ભંગ બદલ કડક સજામાંથી મુક્તિ મળી.
શહબાઝ બદેશાની વાઇલ્ડ કાર્ડ એન્ટ્રીની ચર્ચા
ઉલ્લેખનીય છે કે, શહબાઝ બદેશાની વાઇલ્ડકાર્ડ એન્ટ્રી બિગ બોસ 19માં થઈ છે. જોકે, શરૂઆતમાં તેને પ્રીમિયરના દિવસે જ આવવાનું હતું, પણ ઓછા વોટ મળવાના કારણે મૃદુલ તિવારીને તક મળી હતી. સલમાન ખાન દરેક 'વીકએન્ડ કા વાર'માં શહબાઝના ગેમની પ્રશંસા કરતા નજરે પડે છે, જ્યારે મૃદુલને વારંવાર પોતાની રમત બદલવા માટે સલાહ આપે છે. શહબાઝે આ થપ્પડકાંડ પર જે પરિપક્વતા બતાવી, તેનાથી તેની ઇમેજ વધુ મજબૂત બની છે.
