દિપક રાવલ (અમદાવાદ એક્સપ્રેસ ન્યુઝ રિપોર્ટર): ગુજરાતના આદિવાસી બહુલ ધરાવતા દાહોદ જિલ્લાના લિમખેડા તાલુકામાંથી એક અત્યંત ચોંકાવનારા અને સરકારી તંત્રની સરમુખત્યારશાહીને છતી કરતા માધ્યમોના અહેવાલો સામે આવ્યા છે. લિમખેડા વન વિભાગ (Forest Department) માં ચાલી રહેલા કરોડો રૂપિયાના કથિત ભ્રષ્ટાચાર અને ગેરરીતિઓ અંગે જ્યારે સ્થાનિક મીડિયાકર્મીઓ કાયદેસરના સવાલો પૂછવા અને વન વિભાગનો પક્ષ જાણવા ગયા, ત્યારે જવાબદાર સરકારી બાબુ સરેઆમ પોતાનું ભાન ભૂલ્યા હતા.
લિમખેડા ખાતે ફરજ બજાવતા ક્લાસ-૨ ના રેન્જ ફોરેસ્ટ ઓફિસર (RFO) ઋષિત કુમારે પત્રકાર સાથે અત્યંત અભદ્ર વર્તન કરી, લોકશાહીના નિયમોને નેવે મૂકીને ચાલુ વીડિયો રેકોર્ડિંગ બંધ કરાવી દીધું હતું. એટલું જ નહીં, તેમણે મીડિયા પ્રતિનિધિનો મોબાઈલ ફોન આંચકીને ફેંકી દેવાની અને તોડી નાખવાની ગંભીર ધમકી પણ આપી દીધી હતી. આ સમગ્ર ઉદ્ધત વર્તન મામલે પીડિત પત્રકાર દ્વારા લિમખેડા પોલીસ સ્ટેશનમાં સત્તાવાર લેખિત ફરિયાદ દાખલ કરવામાં આવતાં સરકારી આલમમાં ભારે ખળભળાટ મચી ગયો છે.
કરોડોના કથિત ભ્રષ્ટાચારના સવાલો સાંભળતા જ RFO લાલચોળ
મળતી વિગતો અને પોલીસ સ્ટેશનમાં અપાયેલી લેખિત અરજી અનુસાર, લિમખેડા વન વિભાગ હેઠળ સરકારી ગ્રાન્ટમાંથી ચાલતા વિવિધ લોકઉપયોગી અને પર્યાવરણીય પ્રોજેક્ટ્સ જેવા કે બ્લોક પ્લાન્ટેશન, રોડ સાઈડ પ્લાન્ટેશન (વૃક્ષારોપણ), જંગલ વિસ્તારમાં નાની તલાવડીઓનું નિર્માણ તેમજ પાણીના સંગ્રહ માટે ચેક ડેમ નિર્માણના કામોમાં કરોડો રૂપિયાની વ્યાપક ટેકનિકલ અને નાણાકીય ગેરરીતિ થઈ હોવાના અહેવાલો સ્થાનિક માધ્યમોમાં વહેતા થયા હતા.
આ ગંભીર અને સંવેદનશીલ બાબતે વન વિભાગનો સત્તાવાર પક્ષ જાણવા માટે જ્યારે 'ગુજરાત સત્તા દૈનિક', 'અબ તક ચેનલ' અને 'Tv 18' ના સંયુક્ત પ્રતિનિધિ અને પત્રકાર રાવળ અભેસિંગ સોનાભાઈ પોતાની નૈતિક ફરજના ભાગરૂપે RFO ની કચેરીએ પહોંચ્યા હતા, ત્યારે કચેરીમાં હાજર ટેબલ પર બેઠેલા અધિકારી ઋષિત કુમાર સવાલો સાંભળતા જ અચાનક ઉશ્કેરાઈ ગયા હતા અને લાલચોળ થઈને દાદાગીરી પર ઉતરી આવ્યા હતા.
"તમારો મોબાઈલ ફેંકી દઈશ અને તોડી નાખીશ" - સરકારી કચેરીમાં ધમકીભર્યા લમણાં
કેમેરા અને માઇક સામે સરકારી ગ્રાન્ટના દુરુપયોગ અંગે પ્રતિક્રિયા આપવાનો સાફ ઈનકાર કરીને, RFO એ પત્રકારને ધમકાવતા અને આંગળી ચીંધતા કહ્યું કે, "તમારો મોબાઈલ ફેંકી દઈશ અને તોડી નાખીશ!" સરકારી કચેરીમાં અન્ય વન કર્મચારીઓ અને હાજર અરજદારોની નજર સામે બનેલી આ વરવી ઘટનાથી સમગ્ર દાહોદ જિલ્લાના સ્થાનિક પત્રકાર આલમ, પ્રેસ ક્લબ અને જાગૃત નાગરિકોમાં વહીવટી તંત્ર વિરૂદ્ધ ભારે રોષ ફાટી નીકળ્યો છે. સવાલો પૂછવાની આઝાદી પર તરાપ મારતા આ ક્લાસ-૨ ના વન અધિકારી સામે શિસ્તભંગના કડક વહીવટી પગલાં લેવાની માંગ બુલંદ બની છે.
પીડિત પત્રકાર રાવળ અભેસિંગે લિમખેડા પોલીસ સ્ટેશનમાં આપી લેખિત અરજી
RFO ઋષિત કુમારના આ હિંસક અને ધમકીભર્યા વર્તનથી સહેજ પણ ડર્યા વગર, પત્રકાર રાવળ અભેસિંગ સોનાભાઈએ કાનૂની લડત આદરવાનો નિર્ણય કર્યો છે. તેમણે કચેરીના પ્રતીકાત્મક દ્રશ્યો અને ઘટનાના ઓડિયો-વીડિયો પુરાવાઓ સાથે લિમખેડા પોલીસ સ્ટેશનમાં કાયદેસરની લેખિત અરજી પાઠવી છે. પત્રકાર સંગઠનોના સમર્થન સાથે કરાયેલી આ ફરિયાદમાં મુખ્યત્વે ૩ મોટી માંગણીઓ પોલીસ તંત્ર સમક્ષ મૂકવામાં આવી છે:
પત્રકારને ફરજ પાલન દરમિયાન ધમકી આપવા બદલ RFO ઋષિત કુમાર વિરુદ્ધ કાયદેસરના ગુનાહિત કાયદા હેઠળ તુરંત FIR દાખલ કરો.
ઘટના સમયે વન વિભાગની કચેરીમાં લાગેલા સત્તાવાર CCTV ફૂટેજ અને વિડીયો પુરાવાઓ જપ્ત કરી તેની તટસ્થ ફોરેન્સિક તપાસ કરો.
ગ્રાઉન્ડ લેવલ પર ભ્રષ્ટાચાર ઉજાગર કરતા પત્રકારો પર થતા હુમલા અટકાવવા માટે તેમને યોગ્ય વહીવટી અને શારીરિક સુરક્ષા પૂરી પાડો.
ભ્રષ્ટાચાર છુપાવવા મીડિયાનો અવાજ દબાવવાનો પ્રયાસ?
આ હાઈવોલ્ટેજ ડ્રામા બાદ દાહોદના બુદ્ધિજીવી વર્ગમાં એવા સવાલો ઉઠી રહ્યા છે કે, લોકશાહીની ચોથી જાગીર સમાન મીડિયાના પ્રતિનિધિ સાથે જવાબદાર ક્લાસ-૨ અધિકારી દ્વારા આવું અસંસ્કારી અને અસંવિધાનિક વર્તન કેટલું યોગ્ય ગણાય? જો વન વિભાગના તમામ કામો પારદર્શક અને નિયમાનુસાર જ થયા હોય, તો પછી RFO ને મીડિયાના પ્રશ્નોનો સામનો કરવામાં આટલો બધો ડર અને ક્રોધ કેમ આવ્યો? શું લિમખેડા વન વિભાગ પોતાનો કરોડો રૂપિયાનો ભ્રષ્ટાચાર અને કૌભાંડો છુપાવવા માટે મીડિયાનો અવાજ લાઠીશાહી અને ધમકીથી દબાવવાનો પ્રયાસ કરી રહ્યું છે?
આ ઘટના બાદ હવે સમગ્ર પંથકની જનતા અને પત્રકારોની નજર લિમખેડા પોલીસ અને વન વિભાગના ઉચ્ચ અધિકારીઓ (Dfo) પર ટકેલી છે કે તેઓ આ અહંકારી RFO સામે ક્યારે, કેવી અને કેટલી કડક કાનૂની કાર્યવાહી કરે છે.
