અમદાવાદ: પશ્ચિમ રેલવે દ્વારા આગામી દિવાળી અને છઠ પૂજા જેવા મોટા તહેવારોમાં ઉત્તર પ્રદેશ અને બિહાર તરફ જતા મુસાફરોની ભારે માંગને ધ્યાનમાં રાખીને મહત્વનો નિર્ણય લેવાયો છે. રેલવેએ સાબરમતી (Sabarmati) સ્ટેશનથી ગોરખપુર અને બેગુસરાય વચ્ચે અનારક્ષિત સ્પેશિયલ ટ્રેન (Unreserved Special Train) દોડાવવાની જાહેરાત કરી છે. આ સ્પેશિયલ ટ્રેનો વિશેષ ભાડા પર ચલાવવામાં આવશે અને તેમાં તમામ કોચ અનારક્ષિત (જનરલ) શ્રેણીના રહેશે, જેથી છેલ્લી ઘડીએ વતન જનારા લાખો લોકોને મોટી રાહત મળશે.
સાબરમતીથી શરૂ થતી બે સ્પેશિયલ ટ્રેનની વિગતો
પશ્ચિમ રેલવેના મીડિયા અહેવાલ મુજબ, તહેવારો દરમિયાન મુસાફરોની સુવિધા માટે બે અલગ-અલગ રૂટ પર કુલ ૪૦ ફેરા (ટ્રીપ) દોડાવવાનો નિર્ણય લેવાયો છે. બંને ટ્રેનો ગુજરાતના મહેસાણા, પાલનપુર અને આબુરોડ જેવા મુખ્ય સ્ટેશનો પર રોકાણ કરશે, જેની વિગતો નીચે મુજબ છે:
૧. સાબરમતી – ગોરખપુર ત્રિસાપ્તાહિક સ્પેશિયલ ટ્રેન (૧૨ ફેરા)
ટ્રેન નંબર 09429 (સાબરમતી-ગોરખપુર): આ ટ્રેન ૧૬ ઓક્ટોબર ૨૦૨૫ થી ૨૬ ઓક્ટોબર ૨૦૨૫ દરમિયાન દર ગુરુવાર, શુક્રવાર અને રવિવારે સવારે ૦૮:૫૦ વાગ્યે સાબરમતીથી ઉપડશે અને બીજા દિવસે સવારે ૧૦:૦૦ વાગ્યે ગોરખપુર પહોંચશે.
ટ્રેન નંબર 09430 (ગોરખપુર-સાબરમતી): ગોરખપુરથી ૧૭ ઓક્ટોબર ૨૦૨૫ થી ૨૭ ઓક્ટોબર ૨૦૨૫ દરમિયાન દર શુક્રવાર, શનિવાર અને સોમવારે બપોરે ૧૩:૦૦ વાગ્યે ઉપડશે અને બીજા દિવસે બપોરે ૧૫:૩૦ વાગ્યે સાબરમતી પહોંચશે.
રોકાણ: આબુરોડ, મારવાડ જં., અજમેર, જયપુર, લખનૌ, બારાબંકી અને બસ્તી જેવા મુખ્ય સ્ટેશનો પર રોકાશે.
૨. સાબરમતી – બેગુસરાય દૈનિક સ્પેશિયલ ટ્રેન (૨૮ ફેરા)
ટ્રેન નંબર 09431 (સાબરમતી-બેગુસરાય): આ ટ્રેન ૧૪ ઓક્ટોબર ૨૦૨૫ થી ૨૭ ઓક્ટોબર ૨૦૨૫ દરમિયાન દરરોજ બપોરે ૧૨:૦૫ વાગ્યે સાબરમતીથી પ્રસ્થાન કરશે અને ત્રીજા દિવસે સવારે ૦૮:૦૦ વાગ્યે બેગુસરાય પહોંચશે.
ટ્રેન નંબર 09432 (બેગુસરાય-સાબરમતી): બેગુસરાયથી ૧૬ ઓક્ટોબર ૨૦૨૫ થી ૨૯ ઓક્ટોબર ૨૦૨૫ દરમિયાન દરરોજ બપોરે ૧૨:૦૦ વાગ્યે ઉપડશે અને ત્રીજા દિવસે સવારે ૦૫:૦૦ વાગ્યે સાબરમતી પહોંચશે.
રોકાણ: પાલનપુર, મારવાડ જં., અજમેર, જયપુર, પં. દીન દયાળ ઉપાધ્યાય જં., પાટલિપુત્ર જં., સોનપુર અને બરૌની જં. જેવા મુખ્ય સ્ટેશનો પર રોકાશે.
રેલવેએ મુસાફરોને ટ્રેનના સમય, સ્ટોપેજ અને સંરચના સંબંધી વિગતવાર માહિતી માટે સત્તાવાર વેબસાઇટ www.enquiry.indianrail.gov.in પર મુલાકાત લેવા જણાવ્યું છે. આ Festival Special Train ની શરૂઆતથી તહેવારોમાં વતન જવું સરળ બનશે.
