મનીષ તિવારીની પોસ્ટથી રાજકીય ખળભળાટ: ભાજપનો કોંગ્રેસ નેતા રાહુલ ગાંધી પર પ્રહાર

નવી દિલ્હી: કોંગ્રેસના વરિષ્ઠ નેતા મનીષ તિવારીની શ્રીલંકા, બાંગ્લાદેશ અને નેપાળમાં થયેલા સત્તા પરિવર્તન અંગેની સોશિયલ મીડિયા પોસ્ટથી રાજકીય ઘમાસાણ મચી ગયું છે. ભાજપે તેમના નિવેદનોને રાહુલ ગાંધી પરનો સીધો પ્રહાર ગણાવ્યો છે. જોકે, તિવારીએ આ મામલે સ્પષ્ટતા કરતા કહ્યું છે કે "દરેક વાતને કોંગ્રેસ-ભાજપના દૃષ્ટિકોણથી જોવી જરૂરી નથી." તેમણે ફિલિપાઈન્સમાં ભ્રષ્ટાચાર વિરુદ્ધ ચાલી રહેલા વિરોધ પ્રદર્શનો પર એક સમાચાર શેર કરીને જણાવ્યું કે એશિયામાં થઈ રહેલા આ મોટા જનઆંદોલનો દર્શાવે છે કે હવે "એન્ટાઈટલમેન્ટ" એટલે કે "વંશવાદ" સ્વીકાર્ય નથી.

તિવારીની ટ્વીટ અને ભાજપનો પ્રહાર

પોતાની પોસ્ટમાં મનીષ તિવારીએ લખ્યું, "શ્રીલંકામાં જુલાઈ 2023માં રાષ્ટ્રપતિ ગોટાબાયા રાજપક્ષે, જુલાઈ 2024માં બાંગ્લાદેશમાં શેખ હસીના, સપ્ટેમ્બર 2025માં નેપાળમાં કેપી શર્મા ઓલીની સરકારોનું પતન અને હવે ફિલિપાઈન્સમાં ફર્ડિનાન્ડ માર્કોસ જુનિયર સામેના વિરોધ પ્રદર્શનો પાછળ એક જ વાત છે - 'ENTITLEMENT IS NO LONGER ACCEPTABLE TO GEN X, Y, Z'."

ભાજપે આ તક ઝડપી લીધી અને લોકસભા સાંસદના આ નિવેદનને કોંગ્રેસના નેતૃત્વ પર નિશાન સાધવા માટે વાપર્યું. ભાજપના વરિષ્ઠ નેતા અને આઈટી સેલના વડા અમિત માલવિયાએ 'X' પર પોસ્ટ કરી કે, "કોંગ્રેસના વરિષ્ઠ નેતા મનીષ તિવારી, જે G-23 બળવાખોર જૂથના સભ્ય છે, તેમણે ભારતીય રાજકારણના સૌથી મોટા 'નેપો કિડ' રાહુલ ગાંધી પર નિશાન સાધ્યું છે. જનરેશન Zની વાત તો છોડો, કોંગ્રેસના પોતાના અનુભવી નેતાઓ પણ તેમની રાજનીતિથી થાકી ગયા છે. હવે બળવો અંદરથી જ છે."

તિવારીનો વળતો જવાબ અને રાજકીય કટાક્ષ

માલવિયાના હુમલા પર તિવારીએ વળતો જવાબ આપતાં કટાક્ષ કર્યો, "કાશ, કેટલાક લોકો જીવનમાં મોટા થાય. દરેક વાતને કોંગ્રેસ-ભાજપ, 'તેણે કહ્યું, તેણીએ કહ્યું' કે કોઈ X કે Yને નિશાન બનાવવા સુધી સીમિત ન રાખો." તિવારીએ આગળ લખ્યું કે, "દક્ષિણ એશિયા અને પૂર્વ એશિયામાં જે કંઈ થઈ રહ્યું છે તેના ગંભીર રાષ્ટ્રીય સુરક્ષા પરિણામો છે અને તે શા માટે થઈ રહ્યું છે, તેને યોગ્ય પરિપ્રેક્ષ્યમાં સમજવાની જરૂર છે."

ભાજપના સાંસદ અને પ્રવક્તા સંબિત પાત્રાએ પણ આ મામલે કોમેન્ટ કરી. મીડિયા સાથેની વાતચીતમાં તેમણે કોંગ્રેસ પર પ્રહાર કરતા કહ્યું કે, "આપણા દેશના લોકોએ 2014માં જ 'નેપો કિડ'ને હટાવી દીધા છે."

કોંગ્રેસમાં આંતરિક વિખવાદની ચર્ચા

આ પહેલાં પણ ભૂતપૂર્વ કેન્દ્રીય મંત્રી અને ચંદીગઢના સાંસદ તિવારી ત્યારે ચર્ચામાં આવ્યા હતા જ્યારે 'ઓપરેશન સિંદૂર' પર સંસદીય ચર્ચા દરમિયાન કોંગ્રેસ નેતૃત્વએ તેમને બોલવાથી રોકી દીધા હતા. મીડિયા રિપોર્ટ્સ અનુસાર, પાર્ટીને ચિંતા હતી કે વિદેશ ગયેલા સાંસદો સરકાર પર એટલો આકરો હુમલો નહીં કરી શકે જેટલો વિપક્ષ ઇચ્છે છે. આ ઘટનાઓ પર તિવારીએ મીડિયાને જવાબ આપ્યો હતો, "જો તમે મારી મૌનતા નહીં સમજો, તો મારા શબ્દોને પણ ક્યારેય નહીં સમજી શકો."