પાછલા 15 દિવસથી પ્રાંતિજ પોલીસ સ્ટેશન પર એક પીકઅપ ડાલું બોરીઓથી ભરેલું પડ્યું છે, પરંતુ પોલીસ અને તંત્ર હજુ દ્વિધામાં છે કે આ સ્ટોક કોનો છે અને ફરિયાદ કોની સામે નોંધવી? મહીસાગર જિલ્લાના આંગણવાડી કેન્દ્રોનો THR (ટેક હોમ રાશન) સ્ટોક કાળા બજારમાં વેચાતો હોવાનું સનસનીખેજ કૌભાંડ સામે આવ્યું છે.
ગુજરાત સરકારના મહિલા અને બાળ વિકાસ વિભાગ દ્વારા આંગણવાડીઓમાં નાના બાળકોને "પા પા પગલી"થી શિક્ષણની શરૂઆત કરાવવામાં આવે છે. સાથે જ, બાળકો કુપોષિત ન રહે તે માટે પૌષ્ટિક આહાર આપવામાં આવે છે. સગર્ભા અને ધાત્રી માતાઓને પણ આંગણવાડી કેન્દ્રો દ્વારા પોષણયુક્ત ખોરાક આપવામાં આવે છે. પરંતુ આ સરકારી યોજનાને નિષ્ફળ કરી, આંગણવાડીનો સ્ટોક કાળા બજારમાં વેચાઈ રહ્યો હોવાનો ચોંકાવનારો ખુલાસો થયો છે.
સાબરકાંઠા જિલ્લાના પ્રાંતિજ પોલીસે મહીસાગર જિલ્લાના GJ-35 T-4969 નંબરનું પીકઅપ ડાલું ઝડપી પાડ્યું, જેમાં બાલશક્તિ, માતૃશક્તિ અને પૂર્ણાશક્તિની 10-10 કિલોની આશરે 200 બોરીઓ મળી આવી. આ સ્ટોક મહીસાગર જિલ્લાના ચાર તાલુકાની આંગણવાડીઓનો હોવાનું સામે આવ્યું છે. સપ્લાયરનું કહેવું છે કે આ ડાલું ભાડે મોકલાયું હતું અને ડ્રાઈવરે વિરપુરથી ભર્યું હતું. પરંતુ, 15 દિવસથી આ ડાલું પોલીસ સ્ટેશનમાં જ પડ્યું છે, અને હજુ સુધી કોઈ સ્પષ્ટ જવાબ નથી મળ્યો કે આ સ્ટોક કોનો છે અને તે ક્યાં જઈ રહ્યો હતો.
પોલીસની દ્વિધા અને તપાસનો વિષય
પ્રાંતિજ પોલીસે જણાવ્યું કે, "અમે ICDS વિભાગને આ સ્ટોક વિશે જાણ કરી છે. પરંતુ આ સ્ટોક લીગલ છે કે ગેરકાયદે, તેની ખબર અમને કેવી રીતે પડે? સાબરકાંઠા કે મહીસાગર ICDS વિભાગે ફરિયાદ નોંધાવવી પડશે." સાબરકાંઠા જિલ્લાના DSP વિજય પટેલે આ મામલે સ્પષ્ટતા કરી.
4 ઓગસ્ટે યોજાયેલી વિડિયો કોન્ફરન્સ દરમિયાન સચિવ અને જિલ્લા વિકાસ અધિકારીને આ કૌભાંડની જાણ થઈ. તેમને જાણવા મળ્યું કે આ ગાડી મહીસાગર જિલ્લાની છે, પરંતુ સ્ટોક કયા તાલુકાનો છે, તેની તપાસ ચાલુ છે.
આગળ શું?
આ ઘટનાએ ઘણા સવાલો ઉભા કર્યા છે. આંગણવાડીનો પૌષ્ટિક આહાર કાળા બજારમાં કેવી રીતે પહોંચી રહ્યો છે? નાના બાળકો અને સગર્ભા માતાઓનો હક છીનવીને આ સ્ટોક કોણ લઈ જઈ રહ્યું હતું? આ માત્ર તપાસનો વિષય નથી, પરંતુ ગુજરાતની આંગણવાડી યોજનાની પારદર્શિતા અને વિશ્વસનીયતા પર પણ સવાલ ઉભા કરે છે.
જો આવા કૌભાંડો ન રોકાયા, તો ગુજરાતના બાળકો અને માતાઓનું ભવિષ્ય જોખમમાં મુકાઈ શકે છે. આ મામલે તંત્ર અને પોલીસે ઝડપથી કાર્યવાહી કરી, જવાબદારોને શોધી કાઢવા જોઈએ, જેથી આવા કૌભાંડો ફરી ન બને.
