સાવરકુંડલા: ગુજરાતના મુખ્યમંત્રી શ્રી ભૂપેન્દ્રભાઈ પટેલ દ્વારા સાવરકુંડલા શહેરના વિકાસ માટે ₹ ૧૯.૨૮ કરોડના જંગી વિકાસ કામોને સૈદ્ધાંતિક મંજૂરી આપી દેવાઈ છે. ધારાસભ્ય મહેશભાઈ કસવાલાના સઘન પ્રયાસોને પગલે ગુજરાત અર્બન ડેવલોપમેન્ટ મિશન (GUDM) અંતર્ગત આ માળખાકીય સુવિધાઓનો સાવરકુંડલા વિકાસ માટે મંજૂરી મળી છે. આ ગ્રાન્ટ મંજૂર થવાથી શહેરના જુદા જુદા વિસ્તારોમાં રસ્તા અને વરસાદી પાણીના નિકાલની સમસ્યા હળવી થશે, જે સ્થાનિક નાગરિકો માટે મોટી રાહતરૂપ ગણાશે.
આ યોજના હેઠળ સાવરકુંડલા શહેરની કાયાપલટ કરવા માટે કુલ ૧૯૨૮ લાખ રૂપિયાના કામોને લીલી ઝંડી મળી છે. આ ગ્રાન્ટનો મુખ્ય ઉપયોગ ૧૧ નવા બોક્સ કલવર્ટના નિર્માણ માટે કરવામાં આવશે, જે ચોમાસામાં કનેક્ટિવિટી જાળવી રાખવા માટે મહત્ત્વપૂર્ણ છે.
ક્યાં-ક્યાં થશે કામો?
શહેરમાં જ્યાં સૌથી વધુ પાણી ભરાવાની કે કનેક્ટિવિટી તૂટવાની સમસ્યા છે તેવા મુખ્ય વિસ્તારોને આવરી લેવાયા છે. જેમ કે, અમરેલી રોડ ગેટ, શ્રમજીવી નગર-ઘનશ્યામ નગર, નાવલી કંસારા બજાર, ખોડીયાર ચોક-હાથસણી, બીડી કામદાર-મણીનગર, વેલનાથ પરાં, ખાદી કાર્યાલય વિસ્તાર, ગણેશનગર-દીલાભાઈના તબેલા પાસે, મોમાઈ મંદિર પાસે, અને રામજી મંદિર-કેવડા પરા સહિતના સ્થળોએ નવા બોક્સ કલવર્ટ (બ્રિજ) નું નિર્માણ થશે. સૌથી વધુ ₹ ૬૫૦ લાખની રકમ રામજીમંદિર કેવડા પરા બોક્સ કલવર્ટના કામ માટે ફાળવવામાં આવી છે.
લાંબાગાળાનું આયોજન:
સાવરકુંડલા શહેરના બોક્સ કલવર્ટ નિર્માણ નું આ આયોજન આગામી ૩૦ વર્ષના વિઝનને ધ્યાનમાં રાખીને તૈયાર કરાયું છે. મીડિયા અહેવાલ મુજબ, આ પ્રોજેક્ટનો મુખ્ય ઉદ્દેશ્ય લાંબાગાળે ગ્રામીણ કનેક્ટિવિટીને અકબંધ રાખવાનો છે. આ નવા સ્ટ્રક્ચરના નિર્માણથી ચોમાસામાં અવરજવર અટકશે નહીં અને નાગરિકોને પડતી ભારે મુશ્કેલીઓનો અંત આવશે. આ વિશેષ આયોજન પૂરની પરિસ્થિતિઓનો સામનો કરવા માટે બનાવવામાં આવ્યું છે, જે દર્શાવે છે કે રાજ્ય સરકાર શહેરી વિકાસ માટે કટિબદ્ધ છે.
ધારાસભ્ય શ્રી મહેશભાઈ કસવાલાએ મુખ્યમંત્રીશ્રી ભૂપેન્દ્ર પટેલનો આભાર વ્યક્ત કરતાં જણાવ્યું હતું કે, “આ ગ્રાન્ટ અમારા વિસ્તારના લોકોની સુખાકારી અને વિકાસ માટે અત્યંત મહત્ત્વપૂર્ણ સાબિત થશે. સરકાર શહેર વિસ્તારોના વિકાસ માટે કટિબદ્ધ છે અને આ યોજના તેનો ઉત્તમ દાખલો છે.” આ વિકાસ કાર્યોની મંજૂરીથી સ્થાનિક લોકોમાં ખુશીની લાગણી છવાઈ છે.
સાવરકુંડલા શહેરમાં ₹ ૧૯.૨૮ કરોડના વિકાસ કામો મંજૂર. મુખ્યમંત્રી ભૂપેન્દ્ર પટેલે ધારાસભ્ય મહેશ કસવાલાની રજૂઆતને પગલે ૧૧ નવા બોક્સ કલવર્ટ માટે ગ્રાન્ટ આપી. સાવરકુંડલા વિકાસ ના સમાચાર જાણો.
સાવરકુંડલા વિકાસ, મહેશ કસવાલા, ગુજરાત અર્બન ડેવલોપમેન્ટ મિશન, સાવરકુંડલા નવા બોક્સ કલવર્ટ, ભૂપેન્દ્ર પટેલ વિકાસ કામો.
