સિડનીની પેરામાટા નદીમાં એક હૃદયદ્રાવક ઘટના સામે આવી છે, જ્યાં એક પિતા અને તેમની સાત વર્ષની પુત્રીના મૃતદેહ મળી આવતા સમગ્ર વિસ્તારમાં શોકનો માહોલ છવાઈ ગયો છે. શનિવારે સવારે પિતાનો મૃતદેહ મળ્યા બાદ, કલાકોની શોધખોળ પછી બાળકીનો મૃતદેહ પણ મળી આવ્યો હતો. આ ઘટના અંગે અમદાવાદ એક્સપ્રેસને મળેલી માહિતી મુજબ, પોલીસે ગુનો નોંધી તપાસ શરૂ કરી દીધી છે.
આ કરુણ ઘટનાની શરૂઆત શનિવારે બપોરે 11:45 વાગ્યાની આસપાસ થઈ હતી, જ્યારે કોનકોર્ડના બેવ્યુ પાર્ક નજીકથી પસાર થઈ રહેલા એક વ્યક્તિએ નદીમાં એક શંકાસ્પદ રીતે તરતી બોટ અને તેની નજીક એક પુરૂષનો મૃતદેહ જોયો હતો. તાત્કાલિક ઇમરજન્સી સેવાઓને જાણ કરવામાં આવતા, બરવુડ પોલીસ એરિયા કમાન્ડના અધિકારીઓ ઘટના સ્થળે પહોંચ્યા હતા. તેમણે મૃતદેહને પાણીમાંથી બહાર કાઢી CPR આપવાનો પ્રયાસ કર્યો, પરંતુ તે નિષ્ફળ રહ્યો અને વ્યક્તિનું ઘટના સ્થળે જ મૃત્યુ થયું હતું.
પોલીસના પ્રાથમિક અનુમાન મુજબ, મૃતક વ્યક્તિ 40ના દાયકાના વેસ્ટમીડ વિસ્તારના રહેવાસી પિતા હતા, જેમણે તે દિવસે બોટ ભાડે લીધી હતી. બોટની તપાસ કરતા, પોલીસને જાણવા મળ્યું કે તેમની સાત વર્ષની પુત્રી ગુમ હતી. આ જાણ થતા જ પોલીસ અને નિષ્ણાત ડાઈવર્સની ટીમે બાળકીની શોધખોળ શરૂ કરી હતી, અને કલાકોની જહેમત બાદ તેનો મૃતદેહ પણ નદીમાંથી મળી આવ્યો હતો. બરવુડ પોલીસ એરિયા કમાન્ડના કમાન્ડર સુપરિન્ટેન્ડન્ટ ક્રિસ્ટીન મેકડોનાલ્ડે આ ઘટનાને 'સંપૂર્ણ કરુણાંતિકા' ગણાવી હતી.
મેકડોનાલ્ડે વધુમાં જણાવ્યું કે, બપોરે 12:30 વાગ્યે પરિવારના એક મિત્રએ પિતા-પુત્રીની ખબર પૂછવા માટે સત્તાવાળાઓનો સંપર્ક કર્યો હતો, ત્યારે તેમને ખબર નહોતી કે પોલીસે પિતાનો મૃતદેહ 45 મિનિટ પહેલા જ શોધી કાઢ્યો હતો. બાળકીની શોકગ્રસ્ત માતા તપાસ અધિકારીઓને મદદ કરી રહી છે. ઘટના સ્થળે ક્રાઈમ સીન બનાવવામાં આવ્યો છે અને ફોરેન્સિક અધિકારીઓ ભાડે લીધેલી બોટની ઝીણવટભરી તપાસ કરી રહ્યા છે. મૃતકોની હજુ સુધી ઔપચારિક ઓળખ થઈ નથી, પરંતુ પોલીસે જણાવ્યું કે પરિવાર સિડનીના પશ્ચિમમાં આવેલા વેસ્ટમીડનો હતો. આ ઘટના પાછળનું કારણ હજુ અકબંધ છે અને પોલીસ તમામ દિશાઓમાં તપાસ કરી રહી છે.
