સિદ્ધાર્થ મલ્હોત્રા અને તમન્ના ભાટિયાની આગામી ફિલ્મ 'ધ વ્વાન' સંગીતને લઈને વિવાદમાં સપડાઈ છે. સંગીતકાર સરગમ વૈશે આક્ષેપ કર્યો છે કે તેમની મૂળ રચના 'ઐગિરી નંદિની'નો ફિલ્મનાં ટ્રેલરમાં તેમની પરવાનગી વિના ઉપયોગ કરવામાં આવ્યો છે.
વૈશે ઇન્સ્ટાગ્રામ પર એક વીડિયો શેર કરીને આ મામલે પોતાની વાત રજૂ કરી છે. તેમણે જણાવ્યું કે તેઓ છેલ્લા ત્રણ વર્ષથી આ ગીત પર કામ કરી રહ્યા હતા અને તેના એક ભાગનો 'ધ વ્વાન'ના ટ્રેલરમાં ઉપયોગ કરવામાં આવ્યો છે.
સંગીતકારે વધુમાં આક્ષેપ કર્યો કે ફિલ્મ નિર્માતાઓએ તેમની મૂળ માસ્ટર ફાઇલ, પ્રોડક્શન અને ગાયકનો લગભગ 25 સેકન્ડ માટે ઉપયોગ કર્યો છે. તેમણે કહ્યું, "હું ત્રણ વર્ષથી એક પ્રોજેક્ટ પર કામ કરી રહ્યો છું, અને તેનું એક ગીત, મારી પરવાનગી વિના તાજેતરમાં રિલીઝ થયેલી એક મૂવી, 'ધ વ્વાન'ના ટ્રેલરમાં ઉપયોગ થયો છે... તેમણે મારું ગીત 25 સેકન્ડ માટે વાપર્યું છે."
વૈશે ઉમેર્યું કે, "ગીતનું નામ 'ઐગિરી નંદિની' છે. મારી માસ્ટર ફાઇલનો ઉપયોગ કરવામાં આવ્યો છે, પ્રોડક્શન અને વોકલ પણ મારા જ છે." તેમણે નિર્માતાઓને આ ટ્રેક હટાવવા અપીલ કરી છે, અન્યથા તેમની કાનૂની ટીમ કાર્યવાહી કરશે તેવી ચેતવણી પણ આપી છે. આ ઘટના કોપીરાઈટ ભંગ અને કલાકારોના અધિકારોના રક્ષણ અંગેના પ્રશ્નો ઉભા કરે છે.
