અદાણી ગ્રુપની કંપની અદાણી ગ્રીન એનર્જીએ ચાલુ નાણાકીય વર્ષના પ્રથમ ત્રિમાસિક ગાળામાં ઉત્તમ પરિણામો આપ્યા છે. કંપનીનો ચોખ્ખો નફો લગભગ 51 ટકા વધીને રૂ. 323 કરોડ થયો છે. કંપનીએ સોમવારે શેરબજારને આપેલી માહિતીમાં કહ્યું કે આ ક્વાર્ટરમાં આવકમાં વધારો થવાને કારણે તેનો નફો વધ્યો છે. ગયા વર્ષના સમાન ક્વાર્ટરમાં તેનો ચોખ્ખો નફો રૂ. 214 કરોડ હતો. સમીક્ષા હેઠળના ત્રિમાસિક ગાળા દરમિયાન કંપનીની કુલ આવક વધીને રૂ. 2,404 કરોડ થઈ છે જે ગયા વર્ષના સમાન ક્વાર્ટરમાં રૂ. 1,701 કરોડ હતી.
દેશની સૌથી મોટી ગ્રીન એનર્જી કંપની બની
અદાણી ગ્રીન એનર્જીએ જણાવ્યું હતું કે તે 8,316 મેગાવોટની ઓપરેશનલ ક્ષમતા સાથે દેશની સૌથી મોટી ગ્રીન એનર્જી કંપની બની છે. એપ્રિલ-જૂન ક્વાર્ટરમાં તેણે 6023 મિલિયન યુનિટ વીજળીનું વેચાણ કર્યું હતું, જે ગયા વર્ષના 3550 મિલિયન યુનિટ કરતાં 70 ટકા વધુ છે. કંપનીના ચીફ એક્ઝિક્યુટિવ ઓફિસર અમિત સિંહે નિવેદનમાં જણાવ્યું હતું કે, "સતત મજબૂત નાણાકીય અને ઓપરેટિંગ સિદ્ધિઓ હાંસલ કરવામાં અમારી ટીમનું સમર્પણ મહત્ત્વનું છે."
ગ્રીન એનર્જી ક્ષમતાને 45 GW સુધી વધારવાનો લક્ષ્યાંક
કંપનીએ સૌર, પવન અને હાઇબ્રિડ પ્રોજેક્ટ્સ દ્વારા 2030 સુધીમાં તેની રિન્યુએબલ એનર્જી ક્ષમતાને 45 GW (એક ગીગાવોટ બરાબર 1,000 મેગાવોટ) સુધી વધારવાનું લક્ષ્ય રાખ્યું છે.
