ઉત્તર પ્રદેશના સીતાપુરમાં એક આશ્ચર્યજનક ઘટના સામે આવી છે, જ્યાં એક શાળાના હેડમાસ્ટરે મહિલા શિક્ષિકાની ફરિયાદને લઈને શિક્ષણ અધિકારી પર જાહેરમાં હુમલો કર્યો. આ ઘટનાનો વીડિયો વાયરલ થતાં સમગ્ર શિક્ષણ જગતમાં ખળભળાટ મચી ગયો છે. હેડમાસ્ટર બ્રિજેન્દ્ર કુમાર વર્મા જ્યારે શિક્ષણ અધિકારી અખિલેશ પ્રતાપ સિંહની ઑફિસમાં ખુલાસો આપવા ગયા હતા, ત્યારે આ મામલો બિચક્યો હતો અને હેડમાસ્ટરે ગુસ્સામાં આવીને બેલ્ટ વડે અધિકારી પર હુમલો કર્યો.
શું છે આખો મામલો?
મહમૂદાબાદ બ્લોકમાં આવેલી પ્રાથમિક શાળાના હેડમાસ્ટર બ્રિજેન્દ્ર કુમાર વર્મા સામે એક મહિલા શિક્ષિકાએ ફરિયાદ કરી હતી. આ ફરિયાદના સંદર્ભમાં તેમને બેઝિક શિક્ષા અધિકારી (BSA) અખિલેશ પ્રતાપ સિંહની ઑફિસમાં ખુલાસો આપવા બોલાવવામાં આવ્યા હતા. જોકે, હેડમાસ્ટર દ્વારા આપવામાં આવેલા ખુલાસાથી અધિકારી સંતુષ્ટ ન થયા, જેના કારણે બંને વચ્ચે ઉગ્ર દલીલો થઈ.
વાયરલ વીડિયોમાં શું જોવા મળ્યું?
સોશિયલ મીડિયા પર વાયરલ થયેલા વીડિયોમાં સ્પષ્ટપણે જોઈ શકાય છે કે હેડમાસ્ટર બ્રિજેન્દ્ર વર્મા ગુસ્સામાં ટેબલ પર પોતાની ફાઇલ પછાડી રહ્યા છે. થોડી જ સેકન્ડોમાં તેઓ પોતાનો બેલ્ટ કાઢે છે અને શિક્ષણ અધિકારી અખિલેશ સિંહ પર એક પછી એક વાર કરે છે. આ દરમિયાન અધિકારી તેમને રોકવાનો પ્રયાસ કરે છે, પરંતુ હેડમાસ્ટર તેમને વારંવાર મારતા રહે છે. અન્ય લોકોએ વચ્ચે પડીને હેડમાસ્ટરને ખેંચીને દૂર કર્યા ત્યારે જ આ હુમલો અટક્યો.
પોલીસ કાર્યવાહી અને અધિકારીનું નિવેદન
હુમલા બાદ શિક્ષણ અધિકારી અખિલેશ પ્રતાપ સિંહે જણાવ્યું કે જ્યારે હેડમાસ્ટર તેમના પ્રશ્નોનો જવાબ ન આપી શક્યા, ત્યારે તેઓ આક્રમક બની ગયા. તેઓએ બેલ્ટથી હુમલો કર્યો અને જાનથી મારી નાખવાની ધમકી પણ આપી. આ ઘટના બાદ હેડમાસ્ટરની શહેર પોલીસે ધરપકડ કરી લીધી છે. આ ઘટનાએ સરકારી અધિકારીઓ પર થતા હુમલાની ગંભીરતા દર્શાવી છે અને કાયદાના શાસન પર પ્રશ્નો ઉભા કર્યા છે. આ મામલે આગળની કાર્યવાહી ચાલી રહી છે.
