વોશિંગ્ટન અને તેહરાન વચ્ચે લાંબા સમયથી ચાલી રહેલી તણાવભરી ખેંચતાણ વચ્ચે અચાનક જ વૈશ્વિક રાજકારણમાં ગરમાવો આવી ગયો છે. રવિવારનો દિવસ આખા મિડલ ઈસ્ટ (મધ્ય પૂર્વ) યુદ્ધના અંત માટે ઐતિહાસિક સાબિત થઈ શકે છે, પરંતુ તે જ સમયે બંને દેશો તરફથી આવી રહેલા સામસામે નિવેદનોએ દુનિયાભરના સંરક્ષણ નિષ્ણાતોને ચોંકાવી દીધા છે. એક તરફ કરાર પર સહી થવાની આશા છે, તો બીજી તરફ ચેતવણીઓનો દોર પણ શરૂ થઈ ગયો છે.
ટ્રમ્પનો મોટો દાવો: કાલે જ મિડલ ઈસ્ટ યુદ્ધનો અંત આવશે
અમદાવાદ એક્સપ્રેસના આંતરરાષ્ટ્રીય અહેવાલ મુજબ, અમેરિકાના રાષ્ટ્રપતિ ડોનાલ્ડ ટ્રમ્પે સોશિયલ મીડિયા પ્લેટફોર્મ 'ટ્રુથ સોશિયલ' પર એક ધમાકેદાર પોસ્ટ કરીને દાવો કર્યો છે કે મધ્ય પૂર્વમાં ચાલી રહેલા યુદ્ધને ખતમ કરવા માટેનો ઐતિહાસિક કરાર રવિવારે સાઈન થવા જઈ રહ્યો છે. ટ્રમ્પે ખુશખબરી આપતા લખ્યું કે, આ ડીલ સાઈન થતાંની સાથે જ વ્યાપાર માટે સૌથી મહત્વપૂર્ણ ગણાતી 'સ્ટ્રેટ ઓફ હોર્મુઝ' (હોર્મુઝની સામુદ્રધુની) તમામ દેશો માટે તાત્કાલિક ખોલી દેવામાં આવશે. આ સાથે તેમણે પૂર્વ રાષ્ટ્રપતિ બરાક ઓબામાની ઈરાન નીતિ પર આકરા પ્રહારો કરતા કહ્યું કે, ઓબામાની ડીલ ઈરાનને પરમાણુ બોમ્બ તરફ લઈ જનારી હતી, જ્યારે મારી ડીલ ઈરાનની આસપાસ પરમાણુ હથિયાર ન બનાવવાની મજબૂત દીવાલ ઊભી કરશે.
ટ્રમ્પે ઈરાનને ખુલ્લી ચેતવણી આપતા એમ પણ કહ્યું કે, જો તેઓ આ પ્લાનનો અમલ નહીં કરે તો અમારી પાસે અંતિમ વિકલ્પ (સેન્ય કાર્યવાહી) તૈયાર જ છે. તેમણે ઉમેર્યું કે, અમેરિકા પોતાના શક્તિશાળી B-2 બોમ્બર્સ વિમાનોની મદદથી ઈરાનના પહાડો નીચે દટાયેલો પરમાણુ કચરો (યુરેનિયમનો જથ્થો) બહાર કાઢીને તેનો નાશ કરશે.
ઈરાને અમેરિકાના દાવાને ફગાવ્યો: રવિવારે સહી નહીં થાય
બીજી તરફ, ઈરાને આ મામલે આડો ફાટો માર્યો છે. અમદાવાદ એક્સપ્રેસના પ્રતિનિધિ અનુસાર, ઈરાનના વિદેશ મંત્રાલયના પ્રવક્તા ઈસ્માઈલ બઘાઈએ ટ્રમ્પના દાવાને નકારી કાઢતા સ્પષ્ટ કર્યું છે કે રવિવારે 'ઈસ્લામાબાદ મેમોરેન્ડમ' પર કોઈ હસ્તાક્ષર થવાના નથી. ઈરાને જણાવ્યું કે આગામી દિવસોમાં ડીલ સાઈન થવાની સંભાવના જરૂર છે, પરંતુ અમેરિકાના અસ્થિર વલણને જોતા સત્તાવાર તારીખ જાહેર કરવામાં ઉતાવળ કરવી જોઈએ નહીં.
અમેરિકા અને ઈરાન વચ્ચેના આ હાઈ-વોલ્ટેજ ડ્રામા બાદ હવે રવિવારે મિડલ ઈસ્ટમાં શાંતિ સ્થપાશે કે પછી તણાવ વધુ વકરશે, તેની પળેપળની વૈશ્વિક અપડેટ્સ અમદાવાદ એક્સપ્રેસ આપના સુધી લાઈવ પહોંચાડતું રહેશે.
