ગાંધીનગર: ગુજરાતના ઔદ્યોગિક વિકાસને નવી દિશા આપવા અને રાજ્યને વૈશ્વિક મેન્યુફેક્ચરિંગ હબ તરીકે સ્થાપિત કરવાના ભવ્ય લક્ષ્ય સાથે, મુખ્યમંત્રી ભૂપેન્દ્રભાઈ પટેલે આજે મહાત્મા મંદિરમાં 'વિકસિત ગુજરાત ઔદ્યોગિક નીતિ 'નું અનાવરણ કર્યું છે. આ નીતિ ગુજરાતને સ્પર્ધાત્મક, નવીનતા-આધારિત અને ટકાઉ ઔદ્યોગિક શક્તિ તરીકે ઉભરી આવવામાં મદદ કરશે.
આ નવી ઔદ્યોગિક નીતિમાં ભવિષ્યલક્ષી ક્ષેત્રો (Thrust Sectors) પર વિશેષ ધ્યાન કેન્દ્રિત કરવામાં આવ્યું છે. જેમાં ગ્રીન હાઈડ્રોજન, ગ્રીન એમોનિયા, સેમિકન્ડક્ટર સંલગ્ન યુનિટ્સ, રોબોટિક્સ, ડ્રોન, અવકાશ સંબંધિત ઉત્પાદન અને ઇલેક્ટ્રિક વાહનો જેવા ઉભરતા ઉદ્યોગોનો સમાવેશ થાય છે. આ ક્ષેત્રોમાં રોકાણને પ્રોત્સાહન આપીને ગુજરાત આગામી દાયકાની વૈશ્વિક માંગને પહોંચી વળવા સજ્જ બનશે.
MSME અને મોટા ઉદ્યોગો માટે આકર્ષક પ્રોત્સાહનોની પણ જાહેરાત કરવામાં આવી છે. MSME એકમોને તેમની પસંદગી મુજબ મૂડી સબસિડી, વ્યાજ સબસિડી અને પાવર ટેરિફ કન્સેશનનો લાભ મળશે. આ ઉપરાંત, મોટા, મેગા અને અલ્ટ્રા-મેગા યુનિટ્સ માટે પ્રોજેક્ટની જરૂરિયાત મુજબ આકર્ષક પ્રોત્સાહન પેકેજોની જોગવાઈ કરવામાં આવી છે, જે રાજ્યમાં મોટા પાયે રોકાણને આકર્ષવામાં મદદરૂપ થશે.
મહિલા અને યુવા ઉદ્યોગસાહસિકતાને વેગ આપવા માટે પણ આ નીતિમાં મહત્વપૂર્ણ પગલાં લેવાયા છે. મહિલા સંચાલિત સ્ટાર્ટઅપ્સને દર મહિને ₹30,000નું મેન્ટેનન્સ ભથ્થું અને મહિલા ઉદ્યોગસાહસિકોને વધારાની 1% વ્યાજ સબસિડી આપવામાં આવશે. કારકિર્દી વિરામ પછી ઉદ્યોગમાં ફરી જોડાતી મહિલાઓ માટે વિશેષ તાલીમ અને ભાડા સહાયની પણ જોગવાઈ છે, જે મહિલા સશક્તિકરણને પ્રોત્સાહન આપશે. ગુજરાતને સંશોધન અને વિકાસ (R&D)નું હબ બનાવવા માટે, પ્રથમ પાંચ R&D કેન્દ્રોને વિશેષ પ્રોત્સાહનો અપાશે, જેથી નવીનતા અને તકનીકી પ્રગતિને વેગ મળે.
