આમ આદમી પાર્ટી ભલે મુશ્કેલીમાં હોય પરંતુ તે પાર્ટીના નેતાઓને પ્રમોશન આપી રહી છે. સમાચાર આવ્યા છે કે પાર્ટીએ દિલ્હી મહિલા આયોગના અધ્યક્ષ સ્વાતિ માલીવાલ ને રાજ્યસભામાં મોકલવા માટે નામાંકિત કર્યા છે. અગાઉ પાર્ટીએ દિલ્હી દારૂ કૌભાંડ કેસના આરોપી સાંસદ સંજય સિંહને રાજ્યસભામાં ફરીથી નામાંકિત કરવાનો નિર્ણય લીધો છે.
દિલ્હીથી AAPના ત્રણ સાંસદો
દિલ્હીમાં આમ આદમી પાર્ટીને સારી બહુમતી છે. દિલ્હીમાં રાજ્યસભાની 3 બેઠકો છે. હાલમાં સંજય સિંહ, નારાયણ દાસ ગુપ્તા અને સુશીલ કુમાર ગુપ્તા આમ આદમી પાર્ટી તરફથી રાજ્યસભાના સભ્ય છે. આ તમામનો કાર્યકાળ 27 જાન્યુઆરીએ પૂરો થઈ રહ્યો છે. રાજ્યસભા માટે નોમિનેશન પ્રક્રિયા શરૂ થઈ ગઈ છે અને તેના માટે 19 જાન્યુઆરીએ ચૂંટણી યોજાશે.
અત્યાર સુધી પ્રાપ્ત માહિતી અનુસાર, પાર્ટીએ સંજય સિંહને રાજ્યસભા માટે ફરીથી નામાંકિત કર્યા છે. આ સાથે જ નારાયણ દાસ ગુપ્તાનું નામ પણ ફરી નિશ્ચિત હોવાનું કહેવાય છે. આ મુજબ AAP સુશીલ કુમાર ગુપ્તાની જગ્યાએ સ્વાતિ માલીવાલ ને રાજ્યસભામાં મોકલવા જઈ રહી છે. સુશીલ કુમાર ગુપ્તા ને હાલમાં હરિયાણાના પાર્ટી અધ્યક્ષ બનાવવામાં આવ્યા છે. મળતી માહિતી અનુસાર, પાર્ટીએ તેમને રાજ્યમાં યોજાનારી ચૂંટણી પર ધ્યાન કેન્દ્રિત કરવા કહ્યું છે.
સંજય સિંહે હાઈકોર્ટનો દરવાજો ખટખટાવ્યો હતો
દિલ્હીની એક કોર્ટે આમ આદમી પાર્ટી (AAP)ના સાંસદ સંજય સિંહ ને રાજ્યસભા માટે ફરીથી નોમિનેશન માટે દસ્તાવેજો પર સહી કરવાની મંજૂરી આપી છે. દરમિયાન સંજય સિંહે ગુરુવારે જામીન માટે દિલ્હી હાઈકોર્ટમાં અરજી કરી છે. તમને જણાવી દઈએ કે ગયા વર્ષે 4 ઓક્ટોબરે ED એ સંજય સિંહ ની મની લોન્ડરિંગ કેસમાં ધરપકડ કરી હતી. ત્યારથી સંજય સિંહને જામીન મળ્યા નથી.
