અમદાવાદના સર્વાંગી વિકાસ, રેલવે ઇન્ફ્રાસ્ટ્રકચર સુદૃઢીકરણ તથા નાગરિકોને વધુ સારી સુવિધાઓ ઉપલબ્ધ કરાવવાના હેતુથી 12 જૂન, 2026ના રોજ અમદાવાદના માનનીય મેયર શ્રી હિતેશ બારોટ, અમદાવાદ પશ્ચિમના માનનીય સાંસદ શ્રી દિનેશ મકવાણા, અમદાવાદ મહાનગરપાલિકાની સ્ટેન્ડિંગ કમિટીના ચેરમેન શ્રી કમલેશ પટેલ તથા દરિયાપુરના માનનીય ધારાસભ્ય શ્રી કૌશિક જૈને મંડળ રેલ પ્રબંધક કચેરી ખાતે મંડળ રેલ પ્રબંધક શ્રી વેદ પ્રકાશ સાથે મહત્વપૂર્ણ બેઠક યોજી હતી. આ બેઠકમાં રેલવે અને અમદાવાદ મહાનગરપાલિકા વચ્ચે વધુ સારા સમન્વય દ્વારા વિવિધ વિકાસલક્ષી અને જનહિતના મુદ્દાઓ પર વિસ્તૃત ચર્ચા કરવામાં આવી.
બેઠક દરમિયાન રેલવે અવસંરચનાના સર્વાંગી મજબૂતીકરણ, સ્ટેશન પુનર્વિકાસ યોજનાઓ, લેવલ ક્રોસિંગ નાબૂદી તેમજ ‘ફાટક મુક્ત ભારત’ના લક્ષ્યને સિદ્ધ કરવા માટે રેલવે ઓવરબ્રિજ (ROB) અને રોડ અંડરબ્રિજ (RUB)ના નિર્માણ, નવી રેલલાઈનોના વિસ્તરણ સહિતના અનેક મહત્વપૂર્ણ વિષયો પર ગંભીર અને સાર્થક ચર્ચા કરવામાં આવી. વિસ્તારના ઝડપી શહેરી વિકાસ અને વધતી જતી પરિવહન જરૂરિયાતોને અનુરૂપ આધુનિક, સુરક્ષિત અને નિરંતર રેલ સંપર્ક સુનિશ્ચિત કરવા માટે વિવિધ યોજનાઓના અસરકારક અમલીકરણ તથા બહુ-એજન્સી સમન્વયને વધુ મજબૂત બનાવવા પર વિશેષ ભાર મૂકવામાં આવ્યો.
બેઠકમાં માનનીય મેયર શ્રી હિતેશ બારોટે આંબલી રોડ સ્ટેશન આસપાસ આવેલી રેલવે જમીનના યોગ્ય વિકાસ અને તેના વધુ સારા ઉપયોગ અંગે પોતાના સૂચનો રજૂ કર્યા તથા શહેરના ઝડપી વિકાસને ધ્યાનમાં રાખીને આ વિસ્તાર માટે દીર્ઘકાલીન આયોજન કરવાની જરૂરિયાત પર ભાર મૂક્યો.
અમદાવાદ મહાનગરપાલિકાની સ્ટેન્ડિંગ કમિટીના ચેરમેન શ્રી કમલેશ પટેલે મણિનગર સ્થિત રેલવે લેવલ ક્રોસિંગ સંખ્યા-308 પર પ્રસ્તાવિત રેલવે ઓવરબ્રિજ અંગે સ્થાનિક નાગરિકોની અપેક્ષાઓ અને સૂચનો રજૂ કર્યા તથા રેલવે અને અમદાવાદ મહાનગરપાલિકાના સંયુક્ત પ્રયાસોથી આ મહત્વપૂર્ણ યોજનાને ઝડપથી પૂર્ણ કરવાની જરૂરિયાત પર ભાર મૂક્યો.
દરિયાપુરના માનનીય ધારાસભ્ય શ્રી કૌશિક જૈને અમદાવાદ સ્ટેશન આસપાસ ઉપલબ્ધ રેલવે જમીનનો એવો વિકાસ કરવાની ભલામણ કરી કે જેના કારણે સ્થાનિક નાગરિકો તથા વ્યાપારિક પ્રવૃત્તિઓને મહત્તમ લાભ મળી શકે. તેમણે પ્રાદેશિક જરૂરિયાતોને અનુરૂપ વિકાસ યોજનાઓને પ્રાથમિકતા આપવાની જરૂરિયાત પર ભાર મૂક્યો.
અમદાવાદ પશ્ચિમના માનનીય સાંસદ શ્રી દિનેશ મકવાણાએ પોતાના સંસદીય ક્ષેત્ર સાથે સંકળાયેલા વિવિધ માળખાકીય તથા જનસુવિધા સંબંધિત મુદ્દાઓ બેઠકમાં રજૂ કરતાં રેલવે યોજનાઓના ઝડપી અમલીકરણ અને નાગરિકોને વધુ સારી સુવિધાઓ ઉપલબ્ધ કરાવવાની આવશ્યકતા પર ભાર મૂક્યો. તેમણે ઓમનગર ફાટક ખાતે રોડ અંડરબ્રિજના નિર્માણ કાર્યને પૂર્ણ કરવા માટે દરેક પ્રકારની સહાય આપવાની ખાતરી આપી અને તેને વહેલી તકે પૂર્ણ કરવા જણાવ્યું.
મંડળ રેલ પ્રબંધક શ્રી વેદ પ્રકાશે બેઠક દરમિયાન અસારવા સ્ટેશનના ચમનપુરા તરફ બીજા પ્રવેશદ્વારની સ્થાપના, ચામુંડા બ્રિજ સાથે વધુ સારી જોડાણ વ્યવસ્થા વિકસાવવા તેમજ પ્લેટફોર્મના વિસ્તરણની સંભાવનાઓ અંગે પણ ચર્ચા કરી. આ સંદર્ભમાં ભવિષ્યમાં જરૂરી માળખાકીય વિકાસ દ્વારા તેને દેશના સૌથી લાંબા પ્લેટફોર્મ તરીકે વિકસાવવાની સંભાવનાઓ અંગે પણ વિચારણા કરવામાં આવી.
બેઠક દરમિયાન મંડળ રેલ પ્રબંધક શ્રી વેદ પ્રકાશે માહિતી આપી કે ભારતીય રેલવેનું સૌથી મોટું 100 લાઇન ધરાવતું કોચિંગ ડિપો વટવામાં વિકસાવવામાં આવશે. ઉપરાંત, ગોરા-ઘૂમા રોડ અંડરબ્રિજ (RUB)ને ટૂંક સમયમાં સામાન્ય જનતા માટે સમર્પિત કરવા અંગે પણ સકારાત્મક ચર્ચા થઈ.
આ પ્રસંગે વરિષ્ઠ મંડળ વાણિજ્ય પ્રબંધક શ્રી અનુ ત્યાગીએ પ્રેઝન્ટેશન દ્વારા અમદાવાદ મંડળની નોંધપાત્ર સિદ્ધિઓ તથા વિવિધ મહત્ત્વાકાંક્ષી યોજનાઓ અંગે જનપ્રતિનિધિઓને માહિતગાર કર્યા. તેમણે જણાવ્યું કે નાણાકીય વર્ષ 2025-26 દરમિયાન અમદાવાદ મંડળ પશ્ચિમ રેલવેનું શ્રેષ્ઠ પ્રદર્શન કરનાર મંડળ તરીકે ઉભરી આવ્યું છે. મંડળ દ્વારા પશ્ચિમ રેલવેના કુલ માલ લદાણમાં આશરે 49 ટકા અને માલ આવકમાં 48.17 ટકાનો ફાળો આપવામાં આવ્યો છે. ભારતીય રેલવેના તમામ મંડળોમાં અમદાવાદ મંડળ માલ લદાણ ક્ષેત્રે આઠમા તથા માલ આવકમાં સાતમા સ્થાને રહ્યું છે. ત્યારબાદ અમદાવાદ સ્ટેશન પુનર્વિકાસ યોજના, મલ્ટી-મોડલ ટ્રાન્સપોર્ટ હબ તથા પ્રસ્તાવિત એલિવેટેડ રોડ નેટવર્ક સંબંધિત યોજનાઓ અંગે પણ માહિતી આપવામાં આવી.
આ અવસરે મંડળ રેલ પ્રબંધક શ્રી વેદ પ્રકાશે જણાવ્યું કે અમદાવાદ સ્ટેશનનું નવું દક્ષિણ (South) સ્ટેશન ભવન આગામી વર્ષના એપ્રિલ માસ સુધી મુસાફરો માટે કાર્યરત થવાની સંભાવના છે, જેના કારણે સ્ટેશન પર મુસાફર સુવિધાઓમાં વધારો થશે અને સ્ટેશન સુધી સરળ પહોંચ સુનિશ્ચિત થશે.
